မြန်မာနိုင်ငံသည် အာဟာရချို့တဲ့မှု အမြင့်မားဆုံး ၃၆ နိုင်ငံတွင် ပါဝင်

#Support_1000_Days

မြန်မာနိုင်ငံသည် အာဟာရချို့တဲ့မှု အမြင့်မားဆုံး ၃၆ နိုင်ငံတွင် ပါဝင်နေပြီး ကလေးငယ် နှစ်ဦးလျှင် တစ်ဦးမှာ အာဟာရချို့တဲ့နေသည်ကို တွေ့ရှိခဲ့ရကြောင်း ဇွန် ၁၆ ရက်က UNOPS ရုံး၌ ပြုလုပ်သည့် ကလေးငယ်များတွင် အာဟာရမြှင့်တင်ခြင်းကို နှိုးဆော်သည့် “ရက်တစ်ထောင်” ဗီဒီယိုဖိုင် မိတ်ဆက်ပွဲ အခမ်းအနားတွင် Lift လူမှုအဖွဲ့အစည်းမှ Lead Technical Officer ဖြစ်သူ Mr.Steve Dowell က ပြောကြားသည်။

မြန်မာနိုင်ငံတွင် အာဟာရချို့တဲ့သည့် ကလေးငယ်များအား လေ့လာရာတွင် အာဟာရချို့တဲ့သည့် ကလေးငယ်များမှာ နွမ်းပါးမိသားစုများမှဖြစ်ပြီး မြန်မာနိုင်ငံ လူဦးရေ၏ ထက်ဝက်ခန့်မှာ နွမ်းပါးလူဦးရေ ဖြစ်နေသည်ကို တွေ့ရှိခဲ့ရသည့်အတွက် ကလေးငယ်နှစ်ဦးလျှင် တစ်ဦးမှာ အာဟာရချို့တဲ့နေသည်ကို တွေ့ရှိခဲ့ရကြောင်း ၂၀၁၃ ခုနှစ်က အသက်မွေးဝမ်းကျောင်းနှင့် စားနပ်ရိက္ခာဖူလုံရေး ရန်ပုံငွေအဖွဲ့ (Lift) မှ ထုတ်ပြန်ခဲ့သည့် စစ်တမ်းကို ကိုးကား၍ ၎င်းက ပြောကြားခဲ့ခြင်းဖြစ်ကြောင်းလည်း သိရသည်။

“အာဟာရချို့တဲ့ ကလေးငယ်တွေကို ကြည့်တဲ့အခါမှာ ကလေးငယ်တွေဟာ နွမ်းပါးတဲ့ ကလေးငယ်တွေ ဖြစ်တာကို တွေ့ရပါတယ်။ မြန်မာနိုင်ငံရဲ့ လူဦးရေ ၅၀ ရာခိုင်နှုန်းက နွမ်းပါးလူဦးရေ ဖြစ်ပါတယ်။ ဒါကြောင့် ကလေးငယ်နှစ်ယောက်မှာ တစ်ယောက်နှုန်း အာဟာရချို့တဲ့နေတယ်လို့ ဆိုနိုင်ပါတယ်။ အာဟာရချို့တဲ့မှု ပပျောက်ရေး လုပ်ငန်းတွေကို တိုးတက်အောင်လုပ်တဲ့ အခါမှာ ကလေးငယ်တွေအတွက် ရက်ပေါင်း ၁၀၀၀ ကာလအတွင်းမှာ အာဟာရပြည့်ဝအောင် ဆောင်ရွက်ရမှာ ဖြစ်ပါတယ်။ အဲဒီလိုမှ မဟုတ်ရင် ကလေးငယ်တွေဟာ ဖွံ့ဖြိုးမှုနှေးကွေးတာတွေ ဖြစ်လာနိုင်ပါတယ်။ ကျွန်တော်တို့ အနေနဲ့ အာဟာရမြှင့်တင်ရေးအတွက် ဆောင်ရွက်နေတဲ့ အထဲမှာ ကျန်းမာရေးဝန်ကြီးဌာနက ချမှတ်ထားတဲ့ အချက်တစ်ခုဖြစ်တဲ့ ကိုယ်ဝန်ဆောင်မိခင်တွေကို ငွေကြေးထောက်ပံ့ပေးတာတွေကိုလည်း လုပ်နေပါတယ်” ဟု Mr.Steve Dowell က ဆိုသည်။

ထို့ပြင် မြန်မာနိုင်ငံတွင် အာဟာရပြည့်ဝစွာ စားသုံးရန် အသိပညာပိုင်းမှာ အားနည်းနေသလို ယင်းကဲ့သို့ အာဟာရပြည့်မှီအောင် စားသုံးနိုင်ရန် အတွက်လည်း အခက်အခဲများ ရှိနေကြောင်း၊ အာဟာရနှင့် ပတ်သက်သည့် အလေ့အကျင့်ကောင်းများ လုပ်ဆောင်ရန်လည်း လိုအပ်နေကြောင်းနှင့် အာဟာရနှင့် ပတ်သက်သည့် လုပ်ငန်းများ ဆောင်ရွက်ရန်အတွက် အချက်အလက် ရရှိမှုမှာလည်း နည်းပါးနေသေးကြောင်း သိရသည်။

Lift အဖွဲ့ အနေဖြင့် ၂၀၀၉ ခုနှစ်မှ စတင်ကာ မြန်မာနိုင်ငံသို့ ၀င်ရောက်ခဲ့ပြီး မြန်မာနိုင်ငံ အနေဖြင့် ဆင်းရဲနွမ်းပါးမှု လျှော့ချရေးနှင့် စားနပ်ရိက္ခာ ဖူလုံရေး၊ သက်မွေးဝမ်းကျောင်း လုပ်ငန်းများ တိုးတက်ရေးတို့ကို ဆောင်ရွက်ခဲ့ရာ လူဦးရေ ၂ ဒသမ ၈ သန်းကို အထောက်အပံ့များနှင့် အကူအညီများ ပေးနိုင်ခဲ့ပြီး ယင်းတို့အနက် ၁ ဒသမ ၁ သန်းသော လူဦးရေများကို အာဟာရမြှင့်တင်ရေး လုပ်ငန်းများ ဆောင်ရွက်ပေးခဲ့ကြောင်း သိရသည်။

ထို့ပြင် အာဟာရမြှင့်တင်ရေးလုပ်ငန်းများ ဆောင်ရွက်ရာတွင် ယင်းလုပ်ငန်း ဆောင်ရွက်နေသည့် အဖွဲ့အစည်းများကို ငွေကြေးထောက်ပံ့ပေးခြင်းအပြင် နည်းပညာဆိုင်ရာ အကူအညီများ ရရှိရေးနှင့် အာဟာရမြှင့်တင်ရေးနှင့် ပတ်သက်သည့် သင်တန်းများပေးခြင်းတို့ကို ဆောင်ရွက်ခဲ့ပြီး ကလေးငယ်တစ်ဦး အနေဖြင့် သန္ဓေသားအရွယ်မှ နှစ်နှစ်အရွယ်တိုင်အောင် ပထမဆုံး ရက်ပေါင်း ၁၀၀၀ အတွင်း အာဟာရကောင်းစွာ ရရှိရေး၏ အရေးပါပုံကို ရိုက်ကူးထားသည့် “ရက်တစ်ထောင်” အမည်ရှိ ဗီဒီယိုကို အာဟာရဆိုင်ရာ မိတ်ဖက်အဖွဲ့ဖြစ်သည့် LEARN တို့မှ ပူးပေါင်းထုတ်လုပ်ကာ ယင်းဗီဒီယို မိတ်ဆက်ခြင်း အခမ်းအနားကို ဇွန် ၁၆ ရက်က UNOPS ရုံးတွင် ပြုလုပ်ခဲ့သည်။

Writer:
ထွယ်ဆန်အောင်
Eleven media