နို့တင်းလွန်နေပါသလား?

နို့တင်းလွန်နေပါသလား?

နို့တင်းလွန်ခြင်းလက္ခဏာများမှာ-

·         သားမြတ်နှစ်ဖက်လုံးဖြစ်

·         ဖောရောင်

·         အထိမခံနိုင်

·         ပူနွေး

·         အနည်းငယ်နီမြန်း

·         နာကျင်

·         ပြောင်နေ၊ တင်းနေသည်။ နို့သီးခေါင်းတင်းနေသဖြင့် နို့ငုံရခက်သည်။

·         ကနဦးရက်များတွင် မကြာခဏနို့မတိုက်ကျွေးခဲ့သော မိခင်များတွင် မွေးပြီး ၃-၅ ရက် နို့လိုက်လာသောအခါ ဖြစ်လေ့ရှိသည်။


နို့တင်းလွန်တာ မဖြစ်ရအောင် ဘယ်လိုကာကွယ်မလဲ?

မွေးပြီးလျှင်ပြီးချင်း မိခင်ရင်ဘတ်ပေါ် တင်၍ အသားချင်းထိကပ်ပေးပါ။

မွေးပြီးတစ်နာရီအတွင်း မိခင်နို့တိုက်ကျွေးပါ။

ထိကပ်မှုကောင်းစွာနို့စို့စေပါ။

၂၄ နာရီ နေ့ရောညဥ့်ပါ တစ်နေ့ ၁၀-၁၂ ကြိမ် ကလေးစို့လိုသလောက် မကြာခဏ မိခင်နို့တိုက်ကျွေးပါး

(မှတ်ချက်- ပထမ ၁-၂ ရက်တွင် ကလေးသည် တစ်နေ့ ၂-၃ ကြိမ်သာ နို့စို့လေ့ရှိသည်။)

မွေးပြီးလျှင်ပြီးချင်း ကလေးကို မိခင်ရင်ဘက်ပေါ်တင်ပြီး မိခင်နှင့် အသားချင်းထိကပ်ထားပါ။ ကလေးလက်ကိုလည်းကောင်း၊ မိခင်နို့ကိုလည်းကောင်း ဆေးကြောခြင်းမလုပ်ပါနှင့်။ ကလေးသည် မိခင်သားမြတ်ကို အနံ့၊ အမြင်ဖြင့် ရှာဖွေနိုင်ရန် ဖြစ်သည်။

မွေးပြီးစောနိုင်သမျှစောစွာ ကလေးက အဆင်သင့်ဖြစ်သည်နှင့် မိခင်နို့တိုက်ကျွေးပါ။ ကလေးသည် လှုပ်ရှားလာပြီး မိခင်သားမြတ်ကို မိမိဘာသာရှာလိမ့်မည်။ ထိကပ်မှုမှန်ကန်စွာ နို့စို့စေရန် အသေအချာကြည့်ပါ။ မကြာခဏ မိခင်နို့တိုက်ကျွေးပါ- နို့စို့များမှ နို့ထွက်များသည်။

ပထမနို့ကို ကလေးသူ့အလိုအလျောက်လွှတ်ပြီးမှ ဒုတိယသားမြတ်ဘက်သို့ ပြောင်းတိုက်ပါ။ မိခင်နို့တစ်မျိုး တည်းသာတိုက်ပါ။ အခြားအရည်၊ ရေ၊ အစာများမတိုက်ကျွေးပါနှင့်။


နို့တင်းလွန်လာရင် ဘယ်လိုလုပ်မလဲ?

·         ထိကပ်မှုကောင်းစွာ နို့စို့စေပါ။

·         မကြာခဏမိခင်နို့တိုက်ပါ။

·         နို့ရည်စီးဆင်းမှု ကောင်းစေရန် သားမြတ်ကို လက်ချောင်းများဖြင့် သပ်ချပေးပါ။

·         နို့သီးခေါင်းတစ်ဝိုက်ပျော့လာစေရန် ဖိနှိပ်ပေးပါ (နို့စို့လွယ်ရန်)။

·         သားမြတ် ၂-ဖက်လုံး စို့စေပါ။

·         နို့မတိုက်မီ နို့တင်းခြင်း လျော့စေရန် နို့ညှစ်ထုတ်ပါ။

·         နို့မညှစ်ထုတ်မီ နို့ရည်စီးဆင်းမှုလွယ်ကူစေရန် ရေနွေးဝတ်တင်ထားပါ။

·         နို့ညှစ်အပြီး ဖောရောင်မှုသက်သာစေရန် ရေအေးဝတ်တင်ပါ။


နို့သီးခေါင်းနာခြင်း/ကွဲခြင်းဆိုတာ ဘာကို ပြောတာလဲ?

နို့သီးခေါင်းနာနေ/ကွဲနေရင်တော့ သားမြတ်/နို့သီးခေါင်းနာကျင်နေမယ်။ နို့သီးခေါင်းထိပ်မှာ ကန့်လန့်ဖြတ်မျဉ်းတစ်ကြောင်း ဖြစ်နေမယ်။ တစ်ခါတစ်လေသွေးထွက်တယ်။ ရောဂါပိုးဝင်လာနိုင်တယ်။


နို့သီးခေါင်းနာခြင်း/ကွဲခြင်း မဖြစ်အောင် ဘယ်လိုကာကွယ်မလဲ?

ထိကပ်မှုကောင်းစွာ နို့စို့စေပါ။ နို့ပုလင်း၊ ချိုလိမ်နှင့် နို့မတိုက်ပါနှင့်။ စုပ်ယူရပုံ မတူသဖြင့် ကလေးအတွက် နို့သီးခေါင်းကို ဇဝေဇဝါဖြစ်နိုင်သည်။ နို့သီးခေါင်းကို ဆပ်ပြာနှင့် ဆေးခြင်း၊ လိမ်းဆေးလိမ်းခြင်း မပြုပါနှင့်။


နို့သီးခေါင်းနာခြင်း/ကွဲခြင်း ဖြစ်လာပြီဆိုရင် ဘာလုပ်မလဲ?

·         မိခင်နို့တိုက်ခြင်း မရပ်ဆိုင်းပါနှင့်။

·         ထိကပ်မှုကောင်းစွာ နို့စို့စေရန် ကူညီပါ။ ကလေးသည် နို့သီးခေါင်းအောက်မှ သားမြတ်သို့ ချဉ်းကပ်ရမည်။ မိခင်နှင့် နီးကပ်စွာ ပွေ့ချီနို့တိုက်ရမည်။

·         နာကျင်မှုနည်းသည့်ဘက်မှ စတိုက်ပါ။

·         အနေအထားပြောင်းလဲတိုက်ပါ။

·         ကလေးက သူ့အလိုလို နို့ချွတ်ပါစေ။

·         နို့သီးခေါင်းကို နို့ရည်သုတ်လိမ်းပေးပါ။

·         နို့သီးခေါင်းကို ဆပ်ပြာနှင့် ဆေးခြင်း၊ လိမ်းဆေးလိမ်းခြင်း မပြုပါနှင့်။

·         နို့တင်းအောင် စောင့်ပြီးမှ နို့မတိုက်ပါနှင့်။

·         နို့ဘူးမတိ်ုက်ပါနှင့်။


References:

လူထုအတွင်း ၂-နှစ်အောက်ကလေးသူငယ်များ အစာကျွေးခြင်း နှစ်သိမ့်ဆွေးနွေးသင်တန်း၊ ၂၀၁၆ ခုနှစ်။ ကျန်းမာရေး နှင့် အားကစား ဝန်ကြီးဌာန နှင့် ကုလသမဂ္ဂ ကလေးများ ရန်ပုံငွေအဖွဲ့။